رحمانی 30 کے لیے ایک انتہائی خوشی کا موقع ہے کہ اس سال ادارے کے 14 طلبہ نے ریجنل میتھمیٹکس اولمپیاڈ (RMO) کے لیے کوالیفائی کیا ہے۔RMO ایک قومی سطح کا انتہائی مشکل ریاضی کا مقابلہ ہے جو ملک بھر میں منعقد ہوتا ہے۔ اس میں کامیابی کے لیے ریاضی کی گہری سمجھ، تخلیقی انداز میں مسائل حل کرنے کی مہارت، اور دباؤ کے تحت بھی پرسکون رہتے ہوئے درست فیصلہ سازی کی صلاحیت بہت ضروری ہے۔۔ اس امتحان میں کامیاب ہونا بذاتِ خود ایک بہت بڑا اعزاز ہے۔
رحمانی30 کے 14 طلبہ کی اجتماعی کامیابی اس حقیقت کا ثبوت ہے کہ طلبہ سخت محنت کرنے والے ہیں اور ادارے کا تعلیمی نظام مضبوط، منظم اور انتہائی مؤثر ہے۔ ادارے کی توجہ پختہ تدریس، تجربہ کار رہنمائی، اور بہترین تیاری پر مرکوز رہتی ہے۔ یہ طریقہ کار طلبہ کو نصابی حدود سے آگے بڑھ کر حقیقی ریاضی کو سمجھنے اور اسے اپنانے کی صلاحیت فراہم کرتا ہے۔
رحمانی30 کا قیام امیرِ شریعت حضرت مولانا محمد ولی رحمانیؒ کے تعلیمی ویژن کا ثمر ہے۔ آج، یہ ادارہ امیرِ شریعت اور خانقاہ رحمانی کے سجادہ نشین، مولانا احمد ولی فیصل رحمانی صاحب کی سرپرستی میں کامیابی کے منازل طے کر رہا ہے۔ اس موقع پر انہوں نے ایک خصوصی پیغام جاری کیا، جس میں طلبہ، ان کے والدین، اساتذہ، مینٹرز، رحمانی30 ٹیم، 600 پارٹنر اسکولوں، اور تمام معاونین کو دل کی گہرائیوں سے مبارکباد پیش کی گئی۔
انہوں نے مزید ترغیب دی کہ جماعت 7، 8 اور 10 کے محنتی اور ذہین طلبہ کورحمانی30 کے آنے والے داخلہ جاتی امتحانات میں ضرور شرکت کرنی چاہیے۔
رحمانی30 کا بنیادی مقصد یہ ہے کہ مختلف سماجی پس منظر رکھنے والے باصلاحیت بچوں کو معیاری تعلیم تک رسائی حاصل ہوتا کہ وہ اپنی حقیقی صلاحیتوں کو پہچان سکیں اور ریاستی و قومی سطح پر شاندار کارکردگی کا مظاہرہ کرسکیں۔
