شمالی بوسنیا کے برچکو علاقے میں تربیتی پرواز کے دوران پیش آیا حادثہ، ہلاک ہونے والوں میں اٹلی کے دو فوجی اور ریڈ کراس کے دو رضاکار شامل، واقعے کی تحقیقات شروع
بوسنیا: یورپی یونین کے امن مشن سے وابستہ ایک فوجی ہیلی کاپٹر بوسنیا میں حادثے کا شکار ہوگیا، جس کے نتیجے میں چار افراد ہلاک اور 11 دیگر زخمی ہوگئے۔ حادثہ 29 اکتوبر کو شمالی بوسنیا کے برچکو علاقے میں ایک معمول کی تربیتی مشق کے دوران پیش آیا۔ ہیلی کاپٹر میں مجموعی طور پر 15 افراد سوار تھے۔ حادثے کے بعد تمام زخمیوں کو اسپتال منتقل کیا گیا، جہاں ان کا علاج جاری ہے۔
اطلاعات کے مطابق، حادثے کا شکار ہونے والا ہیلی کاپٹر اٹلی کا فوجی ہیلی کاپٹر ’چنوک سی ایچ-47‘ تھا، جو یورپی یونین کی بوسنیا میں تعینات امن فوج ’ای یو ایف او آر‘ (EUFOR) کے ساتھ کام کررہا تھا۔ حادثے کی اطلاع ملتے ہی امدادی ٹیمیں موقع پر پہنچ گئیں اور زخمیوں کو فوری طور پر اسپتال منتقل کیا گیا۔
حادثہ برچکو کے علاقے میں پیش آیا، جو بوسنیا کی راجدھانی سراجیوو سے تقریباً 180 کلومیٹر شمال میں واقع ہے۔ مقامی اسپتال کے ترجمان صالح ابراہیم بیگووچ کے مطابق، تین افراد نے جائے حادثہ پر ہی دم توڑ دیا تھا، جب کہ ایک زخمی نے اسپتال پہنچنے کے بعد جان دے دی۔ اٹلی کی وزارت دفاع نے بتایا کہ ہلاک ہونے والوں میں دو فوجی اور ریڈ کراس کے دو رضاکار شامل ہیں۔
حادثے میں زخمی ہونے والے تمام 11 افراد کو برچکو اسپتال میں داخل کرایا گیا ہے۔ اسپتال انتظامیہ کے مطابق، زخمیوں میں سے تین کو مزید بہتر علاج کے لیے تقریباً 50 کلومیٹر دور واقع توزلا کے اسپتال منتقل کرنے کی تیاری کی جارہی ہے۔ اسپتال کے ترجمان نے کہا کہ اس وقت سب سے اہم ترجیح زخمیوں کی جان بچانا اور انہیں ضروری طبی سہولتیں فراہم کرنا ہے۔
سوشل میڈیا پر حادثے کی ویڈیو وائرل
حادثے کی ایک ویڈیو سوشل میڈیا پلیٹ فارم ’ایکس‘ پر تیزی سے وائرل ہورہی ہے۔ ویڈیو میں ہیلی کاپٹر کو فضا میں بے قابو ہوکر گھومتے اور پھر تیزی سے نیچے گرتے ہوئے دیکھا جاسکتا ہے۔ بعد ازاں وہ ایک گھاس کے میدان میں گر کر تباہ ہوجاتا ہے۔ مقامی میڈیا کی جانب سے جاری کی گئی تصاویر میں ہیلی کاپٹر کا ملبہ بری طرح تباہ شدہ حالت میں دکھائی دے رہا ہے۔
حادثے کی تحقیقات شروع، اٹلی کی قیادت کا اظہارِ افسوس
حکام کے مطابق، فی الحال حادثے کی اصل وجہ معلوم نہیں ہوسکی ہے۔ یورپی یونین کی امن فوج نے واقعے کی مکمل تحقیقات شروع کردی ہیں اور کہا ہے کہ مزید تفصیلات کی تصدیق کے بعد جاری کی جائیں گی۔
ای یو ایف او آر نے واضح کیا ہے کہ اس حادثے میں کسی شہری کو نقصان نہیں پہنچا اور نہ ہی شہری عمارتوں، املاک یا گاڑیوں کو کوئی نقصان ہوا ہے۔
اٹلی کے وزیر دفاع گائیڈو کروسیٹو نے حادثے میں ہلاک ہونے والوں کے اہل خانہ سے تعزیت اور ہمدردی کا اظہار کیا ہے۔ اٹلی کی وزیر اعظم جارجیا میلونی نے بھی ہلاک شدگان کے اہل خانہ اور امن مشن سے وابستہ تمام افراد کے ساتھ دلی افسوس اور یکجہتی کا اظہار کیا ہے۔
