بدری ناتھ سے دہرادون جا رہا ہیلی کاپٹر چمولی ضلع کے چین گاؤں کے قریب پہاڑی سے ٹکرا کر تباہ ہوگیا؛ حادثے کے بعد ٹرانس بھارت ایوی ایشن کی تمام ہیلی کاپٹر سروسز معطل کر دی گئیں۔
چمولی: اتراکھنڈ کے چمولی ضلع میں جوشی مٹھ کے قریب جمعہ کو ایک ہیلی کاپٹر حادثے کا شکار ہو کر تباہ ہوگیا۔ اس میں پائلٹ سمیت سوار تمام چھ افراد کی موت ہوگئی۔ ہیلی کاپٹر بدری ناتھ دھام سے دہرادون جا رہا تھا کہ راستے میں اس کا ایئر ٹریفک کنٹرول سے رابطہ منقطع ہوگیا۔ پولیس کے مطابق حادثے کے بعد تمام چھ افراد کی لاشیں نکال لی گئی ہیں۔
چمولی کے سپرنٹنڈنٹ آف پولیس سرجیت سنگھ پنوار نے بتایا کہ حادثے میں ہیلی کاپٹر میں سوار تمام چھ افراد ہلاک ہوگئے۔ مرنے والوں میں پائلٹ کیپٹن ہمانشو سبھروال (48) بھی شامل ہیں، جو دہلی کے رہنے والے تھے۔ دیگر پانچ مسافروں کی شناخت پرتاپا (41)، ارون سالونکھے (44)، وی بی شنکر گوڑا (39)، سدھیر کے (50) اور ایچ ایس کے نام سے ہوئی ہے۔ یہ تمام افراد کرناٹک کے رہنے والے تھے۔ ارون سالونکھے بنگلورو پولیس کی کرائم برانچ میں انسپکٹر کے عہدے پر تعینات تھے۔
حکام کے مطابق ٹرانس بھارت ایوی ایشن کے زیرِ انتظام ہیلی کاپٹر نے جمعہ کی دوپہر تقریباً 1 بج کر 14 منٹ پر بدری ناتھ دھام سے اڑان بھری تھی۔ اسے دہرادون کے سہستردھارا ہیلی پیڈ پہنچنا تھا۔ تاہم جوشی مٹھ کی وادی میں ہاتھی پربت کے قریب پرواز کے دوران اس کا ایئر ٹریفک حکام سے رابطہ ٹوٹ گیا۔ کچھ ہی دیر بعد ہیلی کاپٹر کے ٹریکنگ سسٹم نے بھی اپنی لوکیشن بھیجنا بند کر دی۔
چمولی ضلع انتظامیہ کے مطابق ہیلی کاپٹر جوشی مٹھ علاقے میں مارواڑی پل کے اوپر واقع جے پی پاور ہاؤس کے قریب ایک پہاڑی سے ٹکرا کر تباہ ہوا۔ حادثے کی اطلاع ملتے ہی پولیس، اسٹیٹ ڈیزاسٹر رسپانس فورس (ایس ڈی آر ایف)، فوج اور انڈو تبت بارڈر پولیس (آئی ٹی بی پی) کے اہلکار جائے حادثہ پر پہنچے اور تلاش و بچاؤ کا مشترکہ آپریشن شروع کیا۔
اتراکھنڈ سول ایوی ایشن ڈیولپمنٹ اتھارٹی کے چیف ایگزیکٹیو آفیسر پرتیک جین نے بتایا کہ حادثے کی اطلاع ملتے ہی راحت اور بچاؤ کا کام شروع کر دیا گیا تھا۔ چمولی کے ایڈیشنل ڈسٹرکٹ مجسٹریٹ وویک پرکاش کے مطابق بھارتی فوج نے سب سے پہلے ضلع مجسٹریٹ کو اس حادثے کی اطلاع دی تھی۔
اتراکھنڈ کے وزیر اعلیٰ پشکر سنگھ دھامی نے سوشل میڈیا پلیٹ فارم ایکس پر حادثے پر افسوس کا اظہار کیا۔ انہوں نے کہا کہ چین گاؤں کے قریب ہیلی کاپٹر حادثے کی اطلاع ملتے ہی ضلع انتظامیہ، ڈیزاسٹر مینجمنٹ محکمہ اور ایس ڈی آر ایف کی ٹیموں نے مشترکہ طور پر راحت و بچاؤ کا کام شروع کر دیا ہے۔ انہوں نے کہا کہ وہ پورے معاملے پر نظر رکھے ہوئے ہیں۔
حادثے کے بعد احتیاطی اقدام کے طور پر ٹرانس بھارت ایوی ایشن پرائیویٹ لمیٹڈ کے تمام ہیلی کاپٹر آپریشنز عارضی طور پر معطل کر دیے گئے۔
