مدھیہ پردیش کے راجیو گاندھی پرودیوگیکی وشوودیالیہ (آر جی پی وی) میں مبینہ طور پر امتحانی سوالنامہ چوری ہونے کے معاملے نے سیاسی رنگ اختیار کر لیا ہے۔ اس واقعے پر کانگریس نے مرکز اور ریاست کی بی جے پی حکومتوں کو شدید تنقید کا نشانہ بناتے ہوئے دعویٰ کیا ہے کہ موجودہ نظام طلبا کے مستقبل کو مسلسل خطرے میں ڈال رہا ہے۔
کانگریس نے اپنے آفیشیل ایکس اکاؤنٹ پر ایک ویڈیو شیئر کرتے ہوئے کہا کہ ملک میں پہلے ہی ’پیپر لیک‘ کے واقعات نے نوجوانوں کا اعتماد مجروح کیا تھا، اور اب ’پیپر چوری‘ جیسے نئے واقعات تعلیمی نظام کی سنگین ناکامی کو ظاہر کر رہے ہیں۔
پارٹی نے الزام عائد کیا کہ بی جے پی کی حکومت اپنی ناقص انتظامیہ اور کمزور نگرانی کے باعث امتحانی نظام کو محفوظ رکھنے میں ناکام رہی ہے۔ کانگریس کے مطابق اس طرح کے واقعات لاکھوں طلبا کی برسوں کی محنت، امیدوں اور مستقبل کو داؤ پر لگا رہے ہیں۔
کانگریس نے مزید کہا کہ نوجوانوں کو شفاف اور منصفانہ امتحانی نظام فراہم کرنا حکومت کی بنیادی ذمہ داری ہے، لیکن موجودہ حکومت اس ذمہ داری کو نبھانے میں مسلسل ناکام ثابت ہو رہی ہے، جس کا خمیازہ ملک کے طلبا کو بھگتنا پڑ رہا ہے۔
