مغربی بنگال کے محکمۂ اسکولی تعلیم کی جانب سے جاری ایک سرکاری حکم نامے کے مطابق ریاست کے تمام سرکاری اور امداد یافتہ اسکولوں میں صبح کے دعائیہ اجلاس کے دوران ’وندے ماترم‘ گانا لازمی قرار دے دیا گیا ہے۔ یہ نیا نظم فوری طور پر نافذ العمل ہوگا اور تمام طلبہ کو اسکول کے آغاز سے قبل اسمبلی میں اس قومی گیت کی ادائیگی کرنی ہوگی۔
محکمۂ تعلیم نے اس سلسلے میں تمام اسکولوں کے سربراہان کو ہدایت دی ہے کہ وہ اس حکم پر سختی سے عمل درآمد کو یقینی بنائیں اور کسی بھی سطح پر کوتاہی نہ ہونے دیں۔ حکومت کے اس فیصلے کے بعد ریاست بھر کے تعلیمی اداروں میں صبح کی اسمبلی کے طریقۂ کار میں یہ نئی تبدیلی شامل کی جائے گی۔
